რაჭაში დადგამენ მეწყერის მსხვერპლების ხსოვნას მიძღვნილ მემორიალს

რაჭის კურორტ შოვში გეგმავენ მომაკვდინებელი მეწყერის მსხვერპლების ხსოვნას მიძღვნილი მემორიალის დადგმას. მემორიალის ადგილის შესარჩევად რაჭა-ლეჩხუმის-ქვემო სვანეთის გუბერნატორი პარმენ მარგველიძე ადგილობრივ მოსახლეობას შეხვდა. ერთ-ერთი შემოთავაზებული ადგილია მინერალური წყარო “რკინის წყალი”. სპეციალისტების მიერ ადგილების შემოწმების შემდეგ გამოცხადდება კონკურსი მემორიალის შესაქმნელად.

მეწყერი 3 აგვისტოს ჩამოწვა, პრაქტიკულად გაანადგურა კურორტი და 30-ზე მეტი ადამიანის სიცოცხლე იმსხვერპლა. გარემოს ეროვნული სააგენტოს პირველადი დასკვნები სტიქიის მიზეზად ბუნებრივი ფაქტორების ერთობლიობას მიუთითებს, მათ შორის, წვიმას, მყინვარის დნობასა და ქვების ცვენას.