სამედიცინო სფეროში გაიზრდება ჯარიმები დარღვევებისთვის

საქართველოს მთავრობას შეაქვს ცვლილებები კანონში „ჯანმრთელობის დაცვის შესახებ“, რომლებიც ითვალისწინებს ჯარიმების გაზრდასა და სამედიცინო და ფარმაცევტული საქმიანობის მარეგულირებელი სააგენტოს უფლებამოსილებების გაფართოებას. სამედიცინო საქმიანობის განხორციელების შესაბამისი უფლების არარსებობის შემთხვევაში 200-500 ლარის ნაცვლად დაწესებულება გადაიხდის 5 ათას ლარს, ხოლო ლიცენზიების პირობების შეუსრულებლობის შემთხვევაში – 15 ათას ლარს.

სამედიცინო დაწესებულებებში სააგენტოს თანამშრომლებს ექნებათ ვიდეოსა და ფოტოს გადაღების, ნებისმიერი სამედიცინო დოკუმენტაციის დალუქვის, ექიმებისგან განმარტებების მოთხოვნისა და სხვა ღონისძიებების განხორციელების საშუალება, რათა დროულად მოახდინონ რეაგირება პაციენტთა საჩივრებზე. მოცემული სიახლეები მიზნად ისახავს პაციენტთა ინტერესების დაცვას, მომსახურების ხარისხის კონტროლსა და უსაფრთხოების უზრუნველყოფას.