დასავლეთ საქართველოში უამინდობის შედეგების ლიკვიდაცია მიმდინარეობს

წინა კვირას აჭარის რეგიონის ხელვაჩაურის რაიონში ძლიერი წვიმის შედეგად მდინარე ყოროლისწყალი ადიდდა და დატბორა კოტეჯები და საცხოვრებელი სახლების ნაწილი, დააზიანა ინფრასტრუქტურა და გზები. ამ დროისთვის სოფლებისკენ მიმავალი გზა უკვე აღდგენილია, მიმდინარეობს აირმომარაგების მილების აღდგენითი სამუშაოები.

უამინდობის შედეგად გურიის სამივე რაიონი – ოზურგეთი, ჩოხატაური და ლანჩხუთი – სერიოზულად დაზარალდა. ნაპირებიდან გადმოსულმა მდინარემ წაიღო დროებითი ხიდები სოფელ ხორეთსა და ქვემო მამათში. ამის შედეგად, დაახლოებით, 150 ოჯახი მოწყდა გარე სამყაროს. ცნობილია, რომ ზოგიერთ სოფელში მეწყრული პროცესები გააქტიურდა. შესაბამისი სამსახურები საგანგებო რეჟიმში აგრძელებენ მუშაობას.