ძველ ბათუმს აღადგენენ

აჭარის მთავრობა საქართველოს ინფრასტრუქტურის სამინისტროსთან ერთად ძველი ბათუმის აღდგენის პროექტს ამზადებს. მისი ბიუჯეტი 200 მლნ ლარზე მეტს (დაახლოებით, $75 მლნ) შეადგენს. პროექტის ფარგლებში, მომდევნო სამი წლის განმავლობაში სამ ათას ოჯახს, რომლებიც ამჟამად ავარიულ სახლებში ცხოვრობს, ახალი საცხოვრებლით უზრუნველყოფენ. გაზაფხულზე ბათუმში ავარიული სტატუსის მქონე 140-ზე მეტი საცხოვრებელი კორპუსი იყო.

აჭარის მთავრობის მეთაურმა თორნიკე რიჟვაძემ განაცხადა, რომ ბათუმს ასევე პირველად ექნება განვითარების გენერალური გეგმა, რომელსაც ამჟამად ქალაქის მუნიციპალიტეტი ამუშავებს. მისი მთავარი მიზანია კულტურული მემკვიდრეობის შენარჩუნება და ავარიული სახლების დროულად შეცვლა.