გურიის გზებზე ამოქმედდება სპეციალური რეჟიმი ტრანსპორტისთვის

საქართველოს საავტომობილო გზების დეპარტამენტმა განაცხადა დასავლეთ საქართველოში, ოზურგეთი-შემოქმედი-ბჟუჟჰესის შიდასახელმწიფოებრივი საავტომობილო გზის 13-32,6 კმ-ზე მოძრაობის სპეციალური რეჟიმის შემოღების შესახებ. სპეციალური რეჟიმი ერთი თვის განმავლობაში, 8 აგვისტოდან 8 სექტემბრის ჩათვლით, გაგრძელდება.

მანქანების მოძრაობა ნებადართული იქნება ორშაბათიდან პარასკევის ჩათვლით 05:00-დან 09:00 საათამდე. შაბათს მოძრაობა ნებადართული იქნება 05:00-დან 09:00 საათამდე და 15:00-დან 20:00-მდე. კვირას მოძრაობა ნებადართული იქნება 05:00-დან 20:00-მდე. დღის დანარჩენ საათებში ყველა სახის საავტომობილო საშუალების მოძრაობა აკრძალულია. მოძრაობის სპეციალური რეჟიმის დაცვის კონტროლი განხორციელდება შინაგან საქმეთა სამინისტროს რეგიონული სამმართველოების მიერ.