ქუთაისში ახალი აუზი გაჩნდა

საქართველოს რეგიონული განვითარებისა და ინფრასტრუქტურის სამინისტრომ ქუთაისში ოლიმპიური საცურაო აუზის მშენებლობის დასრულების შესახებ განაცხადა, რომელიც ადგილობრივი და საერთაშორისო შეჯიბრებების ჩატარებისთვის იქნება გამოყენებული. მისი სიგრძე 50, სიგანე კი 25 მეტრია. კომპლექსში შედის 600 მაყურებელზე გათვლილი ტრიბუნა, პატარა საბავშვო აუზი, სავარჯიშო დარბაზები, გასახდელები სპორტსმენებისა და მწვრთნელებისთვის, საკვები პროდუქტებისა და სპორტული აღჭურვილობის შესანახი ოთახები.

ამჟამად აუზში მიმდინარეობს აღჭურვილობის მონტაჟი და ტესტირება. აუზის შენობაში არის თანამედროვე საინჟინრო ქსელები, სატუმბი სადგურები, ფილტრები, გათბობის, გაგრილებისა და ხანძარსაწინააღმდეგო სისტემები. ტერიტორიაზე არის ავტოსადგომი და საზაფხულო კაფე. აუზის მთელი ინფრასტრუქტურა ადაპტირებულია შშმ პირებისთვის.