კლინიკაზე საჩივრის შეტანა უფრო ადვილი გახდება

ჯანდაცვის მინისტრის მოადგილემ თამარ გაბუნიამ განაცხადა, რომ ჯანდაცვის სამინისტრო მუშაობს პროექტზე, რომელიც საშუალებას მისცემს სამედიცინო მარეგულირებელ სააგენტოს, უშუალოდ შეამოწმოს კლინიკები სასამართლოში მიმართვის გარეშე. ეს იძლევა მიმართვებზე უფრო ოპერატიულად რეაგირების საშუალებას, რომელთა გაგზავნა თუნდაც სოციალური ქსელების მეშვეობით იქნება შესაძლებელი.

ახლა, პაციენტების საჩივრის შემდეგ, სააგენტომ უნდა მიმართოს სასამართლოს, სადაც განცხადებას 72 საათის განმავლობაში განიხილავენ. მიუხედავად იმისა, რომ სასამართლო ყოველთვის იძლევა დადებით გადაწყვეტილებას, კლინიკებს შეუძლიათ სააპელაციო სასამართლოში მიმართვა, რასაც ასევე გარკვეული დრო სჭირდება. შედეგად, დოკუმენტაცია ან სხვა მტკიცებულებები შეიძლება, შეიცვალოს ან გაქრეს.