პირველი კოსმოსში

1934 წლის 9 მარტს დაიბადა მსოფლიოში პირველი კოსმონავტი – იური ალექსეის ძე გაგარინი.

1961 წლის 12 აპრილს ის გაემგზავრა კოსმოსში, რათა დაემტკიცებინა კაცობრიობისთვის, რომ შეუძლებელი არაფერია. მისმა თამამმა ნაბიჯმა მისცა უძლიერესი ბიძგი მეცნიერებისა და ტექნიკის განვითარებას, ხოლო მისი ღიმილი იქცა მშვიდობის სიმბოლოდ.

საბჭოთა კავშირის მაცხოვრებლები ძალიან ამაყობდნენ თავიანთი თანამემამულით. საქართველოს დამსახურებული ჟურნალისტი ეკა ელიავამ აღნიშნა, რომ გაგარინი გახდა კოსმოსზე მეოცნებე მრავალი ბავშვის გმირი. „იმ მომენტში ისეთი ძლიერი გრძნობებით ვიყავით სავსე, რომ მათი სიტყვებით გადმოცემა შეუძლებელი იყო. ადამიანი კოსმოსში! ის, რაც ჩვენთვის იყო სამეცნიერო ფანტასტიკის სფეროდან, რომელსაც ვკითხულობდით და წარმოვიდგენდით, როგორც შორეულ მომავალს, რეალობად იქცა! იური გაგარინმა დაიპყრო ყველა სიმამაცითა და სიკეთით, მოკრძალებითა და მომხიბვლელი ღიმილით“, – ამბობს ის.

იური ალექსეის ძეს ჰქონდა განსაკუთრებული კავშირი საქართველოსთან და მის მცხოვრებლებთან. თვითმხილველების თქმით, 1961 წლის 12 აპრილს, როდესაც ფრენამდე ჯერ კიდევ საკმარისი დრო იყო დარჩენილი, მთავარმა კონსტრუქტორმა სერგეი კოროლევმა გაგარინს მუსიკის მოსმენა შესთავაზა. პირველმა კოსმონავტმა ბულატ ოკუჯავა აირჩია. ხოლო დაშვების შემდეგ, პროფესორ ვიტალი ვოლოვიჩის თქმით, რომელიც პასუხისმგებელი იყო კოსმონავტის კეთილდღეობაზე სამძებრო-სამაშველო ოპერაციის დროს, პირველი, რაც გაგარინმა მოითხოვა, იყო „ბორჯომი“.

საქართველოში დღემდე ახსოვთ პირველი კოსმონავტი. თბილისში არის გაგარინის სახელობის ქუჩა, ხოლო 2005 წლამდე ასევე იყო ამავე სახელწოდების მოედანი (შემდეგ მან საქართველოს ყოფილი პრემიერ-მინისტრის ზურაბ ჟვანიას სახელი მიიღო). მაგრამ ბევრი ქალაქის მცხოვრები მას კვლავ გაგარინისას უწოდებს.