თბილისის ეროვნულ პარკში ირმები გაჩნდება

საქართველოს დაცული ტერიტორიების სააგენტომ და საკონსულტაციო და სასწავლო ცენტრმა თბილისის ეროვნულ პარკში კეთილშობილი ირმების პოპულაციის აღდგენის მემორანდუმს მოაწერა ხელი. ჯერ სპეციალისტები ჩაატარებენ პარკის დეტალურ შეფასებას შესაფერისი ბინადრობის ადგილების დასადგენად, ხოლო შემდეგ ჩამოიყვანენ ცხოველებს სხვა რეგიონებიდან.

საქართველოში კეთილშობილი ირმის შენარჩუნება ეროვნული პრიორიტეტია და მათი პოპულაციის აღდგენის პრიორიტეტულ ტერიტორიად თბილისის ეროვნული პარკი შეირჩა. ახლა კეთილშობილი ირმები ბინადრობს ბორჯომ-ხარაგაულის ეროვნულ პარკში, ლაგოდეხის ნაკრძალსა და გარდაბნის ბიო რეზერვატში. სამომავლოდ მათი შეყვანა ალგეთის ეროვნულ პარკშიც იგეგმება.