დასრულდა სატრანსპორტო კვანძის განახლება მეტროსადგურ “ისნის” მიმდებარედ

თბილისის მერმა კახა კალაძემ განაცხადა მეტროსადგურ “ისნის” მიმდებარე ტერიტორიაზე მდებარე სატრანსპორტო კვანძის სარემონტო სამუშაოების დასრულების შესახებ. სამუშაოების შედეგად კეთილმოეწყო ტროტუარი, განახლდა ასფალტის ფენილი, გაკეთდა საგზაო მონიშვნები და უსაფრთხოების კუნძულები, დაყენდა შუქნიშნები, ავტობუსების გაჩერებებზე დაიგო რკინაბეტონის ფენილი.

აღნიშნულია, რომ განახლება საგრძნობლად გაზრდის გზის გამტარუნარიანობას. ამ მონაკვეთზე ამჟამად, დაახლოებით, 35 საზოგადოებრივი ტრანსპორტის მარშრუტია, რომელიც ყოველდღიურად 130 ათას მგზავრს ემსახურება. გარდა ამისა, ქალაქის სხვადასხვა უბანში მოძრაობის განტვირთვისა და გაუმჯობესების მიზნით ვლინდება და ახლდება გადატვირთული სატრანსპორტო კვანძები.