ქართულ სკოლებში სიახლეებია მოსალოდნელი

საქართველოს განათლებისა და მეცნიერების სამინისტრო ქვეყნის სკოლებში ბავშვების ცოდნის შესამოწმებლად ეროვნული შეფასების ახალ პროექტს ამუშავებს. ჯერჯერობით უცნობია, როგორ შეფასდება სკოლის მოსწავლეების ცოდნა – გამოცდების, ტესტებისა თუ საშუალო GPA ქულის დახმარებით. ასევე დროთა განმავლობაში იგეგმება სკოლაში მიღების ასაკის 5 წლამდე და 8 თვემდე შემცირება.
 
ახლა ქართული სკოლები ათქულიანი შეფასების სისტემას იყენებენ. სავალდებულო საგნების ჩამონათვალში შედის მათემატიკა, ქართული ენა და ლიტერატურა, ქიმია, ფიზიკა, ბიოლოგია, გეოგრაფია, ისტორია და ერთ-ერთი უცხო ენა.

მომავალი სასწავლო წლიდან პირველ კლასში მშობლების სურვილით სწავლა შეეძლებათ ბავშვებს, რომლებიც მიმდინარე წლის 1 ნოემბრამდე ექვსი წლის უნდა გახდნენ. ორ წელიწადში კი საქართველოს განათლებისა და მეცნიერების სამინისტრო ამ თარიღის 31 დეკემბრამდე გადადებას გეგმავს.