ნოემბერში საქართველოში ღვინის სიმპოზიუმი გაიმართება

3-4 ნოემბერს საქართველოში პირველად გაიმართება შვეიცარიის ასოციაციის Grand Jury Du Vin-ის ყველაზე პრესტიჟული ღვინის სიმპოზიუმი, სადაც სტუმრებს ექნებათ ქართული ღვინოების საუკეთესო ნიმუშების დაგემოვნების საშუალება. ღონისძიების ჩატარება კახეთის რეგიონში, წინანდლის მამულში, იგეგმება. სიმპოზიუმში მონაწილეობას მიიღებს ასოციაციის 25 წევრი, მსოფლიოს წამყვანი მეღვინეები, ღვინის ექსპერტები, კრიტიკოსები, ბორდოს უნივერსიტეტის პროფესორები და ასევე სომელიეები და ჟურნალისტები 12 ქვეყნიდან.

ღონისძიებაზე მონაწილეებს ასევე წარუდგენენ კულტურულ პროგრამას, რომლის მსვლელობისას ყველა სტუმარი გაეცნობა ქართულ ტრადიციულ და თანამედროვე ხელოვნებასა და გასტრონომიას. პროგრამის ფარგლებში გაიმართება კლასიკური მუსიკის, ჯაზისა და ქართული ფოლკლორის საღამო სუხიშვილების ეროვნული ბალეტის მონაწილეობით. გარდა ამისა, სიმპოზიუმის სტუმრები შეძლებენ გალა ვახშმით დატკბობას, რომელსაც სამი მიშლენის ვარსკვლავის მფლობელი შეფ-მზარეული მიშლენ იან ჰარტვიგი და Silk Hospitality-ის ბრენდ-მზარეული ირაკლი ასათიანი ჩაატარებენ.