ნონა გაფრინდაშვილი მსოფლიო ტურნეში მიემგზავრება

თბილისში, ჭადრაკის სასახლეში, გაიმართა პირველი ქალი დიდოსტატის ნონა გაფრინდაშვილის ახალი პროექტის პრეზენტაცია. ოქტომბრის ბოლოს ლეგენდარული ქართველი მოჭადრაკე გაემგზავრება ევროპის ქალაქებში ტურნეში “ეთამაშე ჭადრაკის დედოფალს”. პირველი გაჩერება ღონისძიების ფარგლებში 31 ოქტომბერს პალერმოში იქნება.

პრეზენტაციაზე გაიმართა დოკუმენტური ფილმის ჩვენება დიდოსტატის შესახებ. ცერემონიაზე დამსწრებმა საქართველოს პრეზიდენტმა სალომე ზურაბიშვილმა გაფრინდაშვილი თამარ მეფის ორდენით დააჯილდოვა. ეს სახელმწიფო ჯილდო პარლამენტმა 2009 წელს დააწესა, ის ენიჭება მხოლოდ ქალებს ხალხისა და სამშობლოს წინაშე ღირსშესანიშნავი დამსახურებისთვის.