პირველად საქართველოში მსოფლიო თასის ეტაპები ყოველწლიურად გაიმართება

საერთაშორისო სათხილამურო ფედერაციამ (FIS) მიანიჭა მცხეთა–მთიანეთში მდებარე გუდაურისა და სამცხე–ჯავახეთში მდებარე ბაკურიანის სამთო–სათხილამურო კურორტებს ზამთრის სპორტის სახეობებში მსოფლიო თასის საერთაშორისო ეტაპების ყოველწლიურად ჩატარების უფლება. ამ ზამთარს ბაკურიანში ჩატარდება მსოფლიო თასის ეტაპები მოგულისა და სათხილამურო კროსის, ხოლო გუდაურში – სნოუბორდ კროსის დისციპლინებში.

FIS-ის მაღალი რანგის დელეგატები ჩამოვლენ საქართველოს კურორტებზე შეჯიბრებების ჩატარების კონკრეტული ადგილების შესარჩევად.

ეკონომიკის მინისტრის მოადგილემ მარიამ ქვრივიშვილმა განაცხადა, რომ საქართველო ერთადერთი ქვეყანაა, რომელიც გახდა საერთაშორისო სათხილამურო ფედერაციის ყოველწლიური კალენდრის ნაწილი და დადგა ერთ მწკრივში საფრანგეთის, შვეიცარიის, ამერიკისა თუ კანადის ცნობილ სამთო-სათხილამურო კურორტებთან.