მიმდინარეობს თბილისის საერთაშორისო კინოფესტივალი

კვირის ბოლომდე დედაქალაქის კინოთეატრ “ამირანში” ყველა კინომოყვარულისთვის იმართება წლის ერთ–ერთი მთავარი მოვლენა – თბილისის ოცდამეოთხე საერთაშორისო კინოფესტივალი. წელს მის სტუმრებს შორის არიან ისეთი ცნობილი კინომოღვაწეები, როგორებიცაა ტომას ჰეისე გერმანიიდან, ბენუა ვოლნე საფრანგეთიდან, დოვერ ქოსაშვილი ისრაელიდან, რეზა მირკარიმი ირანიდან და სხვები.

ფესტივალის გახსნაზე ნაჩვენები იყო ქართველი რეჟისორის ნანა ჯორჯაძის ფილმი “პეპლების იძულებითი მიგრაცია”, რომელიც ფესტივალის საპატიო პრიზით “ოქროს პრომეთეთი” დაჯილდოვდა.

ქართული ფილმების საკონკურსო პროგრამაში ჟიური შეარჩევს საუკეთესო სრულმეტრაჟიან და მოკლემეტრაჟიან მხატვრულ და დოკუმენტურ ფილმებს.

ფესტივალზე ასევე მიდის სხვადასხვა სექციის ევროპული და მსოფლიო კინოს საუკეთესო ნამუშევრების ჩვენება.