რისთვის იბრძვიან ქართველი ეკოაქტივისტები?

ჯერ კიდევ 18 ნოემბერს დედაქალაქში, გარემოს დაცვისა და სოფლის მეურნეობის სამინისტროსთან, დაიწყო ეკოაქტივისტების პროტესტები. აქციის მონაწილეები ითხოვენ რაჭა–ლეჩხუმისა და ქვემო სვანეთის რეგიონში სანადირო მეურნეობის შექმნის ლიცენზიის გაუქმებას, რომელიც 2022 წელს ბიზნესმენ დავით ხიდაშელს 49 წლით მიენიჭა. უწყება პასუხობს, რომ ლიცენზიას უკვე აუქმებენ.

აღნიშნულია, რომ მეწარმეს გადაეცა 5 მილიონი ლარის ინვესტიციით 104 712 ჰა-ს ფართობზე სანადირო მეურნეობის მოწყობის ლიცენზია. უწყება გადაწყვეტილებას რეგიონის ტურისტული ინდუსტრიის განვითარებითა და სამუშაო ადგილების ორგანიზებით ხსნის.

აქციის მონაწილეების ტრანსპარანტებზე წერია: “რაჭა არ იყიდება”, “ვის კითხეთ? ტყე ხალხს ეკუთვნის”. ხალხი მინისტრთან შეხვედრასა და წელიწადნახევრის წინ გაცემული ლიცენზიის აუცილებელ გაუქმებას ითხოვს.